Шайх Абдулқодир ҳазратлари розияллоҳу анҳу 545 йил ражаб ойининг ўн олтинчи куни эрталаб мадрасада шундай насиҳат қилдилар:

Дунёнинг ҳаммаси ҳикмат, охират амаллари ҳаммаси қудратдир. Буниси ҳикматга ва униси қудратга кўра бино қилинган. Ҳикмат ҳовлисида амални тарк қилиб, қудрат ҳовлисида унинг қудратидан ожиз қолма. Ҳикмат ҳовлисида ҳикматга биноан амал қил.

Риёкорнинг кийими пок, қалби эса нажасдир. У мубоҳларни бажаришда зўр бериб, касб қилишда ялқовлик қилади. Дини туфайли ҳаёт Кечириб, очиқ-ойдин ҳаром бўлган нарсалардан тақво қилмайди. Лекин унинг иши авомга махфий бўлса-да, хослар учун махфий эмас. Барча зуҳди ва тоати зоҳирида кўринади, ботини эмас, зоҳири бунёдкор. Вой бўлсин сенга, Аллоҳга тоат қилиш қаллоблик билан эмас, қалб билан бўлади. Бу нарсаларнинг ҳаммаси қалб ва асрорларга боғлиқ.